Da Wei, nix schmeckt so guat wia dea
i sitz do beim Leitgebtisch
i hob scho drei, geh bring ma no ans hea.

A so an Duascht das nua so zischt
jo beim Heirign do bin i hoid no wea.
Draussn wiads scho finsta, herin brennts Liacht
heit is ka Atmosphea so rundherum,
de Wirtin grantig, da Haura mitn fadn Gsicht
jo weu ka gschäft net geht, es is zu dumm.

Draussn rengts und a so koid,
das so wos gibt i was net warum.
Ka Wunda bei dem Weda das do kan gfoid,
owa es letzte Moi, ha do woas duli,
bum voi da Goatn und des Zimma,
de Wiatsleid san umgschossn wia de Kuli,
des woa a Hetz, a Gaudi, a wunderbores Klima.

Da Wei hot gschmeckt, de Käpf haum daumpft,
de Leit haum gjuchatzt und haum glocht,
gfressn haums, ois wos geht haums einepaumpft.
Guat woas Brodane, woa mit vü Knofe gmocht,
und Dweiwa, wast eh wias san, wauns haum an Duli.

Wurlad weans, gaunz ramlad, jo mia is wuascht,
in dem Punkt, des is gwis, bin i ka Muli.
A hob i heit an duascht,
geh bring ma no a Vierl
a boa gengan no bis daun so weit is
das i Daham net eine find beim Tirl.

I geh hoid gean zum Heirign des is gwis,
den duat, waun i a ala bin, do bin i hoid no wea.
Wauns so um die umadumscharwanzeln,
klane Komplimente mochn de i gean hea,
nennan mi beim Vuanauman, sogn afoch Franzl.

Net so gschpreitzt wia, was wünschen sie der Herr.
A Ochtl uups geht no. Owa bring ma a wos zum Beissn.
A Radl Wuascht des duat ma gfoin. Is eh scho spät,
sche laungsaum muas i zoin,
schau net so, i los eh des Auto steh.

I was i tua Eich heit net gfoin,
sche laungsaum muas i eh scho geh.
Wos griagst, na des stimmt scho,
den Rest gibst denan Kinda in de Dosn.
Pfiat Eich, brauchst net höffn es geht scho,
hawedere heit tua i gaunz sche glosn.

Ah de frische Luft des tuat guat,
jetzt wiri sche laungsaum ham watschln
aha do hob i eh mein Huat.
He, wea gibt ma do a Watschn,
ui mei Oide, bist deppat wuan,
wo kummst den Du dahea
host vieleicht goa an Zurn.

Weu daun geh i glei wida zruck,
denn des sog i da,
denn do beim Heirign,
do bin i hoid no wea.
fw